Главные новости Наурзумского района – Qostanai Media

Науырзым ауданындағы егіс алқаптарында орақ науқаны қызу жүріп жатыр. Шаруалар піскен егінді уақытылы жинап, маңдай термен өсірген астықты ысырапсыз қамбаға құюда. Дала төсінде комбайндар тынымсыз қозғалып, еңбек науқанының қызған шағы сезіледі.

Биылғы егін маусымы шаруалар үшін оңай болған жоқ. Көктемде жауын-шашынның жақсы түсуі егіннің көктеп, өсуіне қолайлы жағдай жасағанымен, жаздың аптап ыстығы мен кейінгі құрғақшылық өнімділікке өз әсерін тигізді.

Шаруа қожалық басшысы Павел Ивановичтің айтуынша, ауа райының қолайсыздығына байланысты жоспарланған өнім көлеміне толық қол жеткізу қиын болғанымен, бидайдың сапасы көңіл қуантады.

-Биыл жауын-шашын жақсы жауды. Дегенмен жаздың аптап ыстығы әбігерге салды деуге болады. Құрғақшылықтың әсерінен көздеген центнерімізді ала алмадық. Бірақ соған қарамастан, бидайдың сапасы жақсы, дәннің клейковинасы жоғары. Бұл – біз үшін жақсы көрсеткіш, – дейді Павел Иванович.

Қазір шаруалардың басты мақсаты – егінді белгіленген мерзімде жинап, өнімді шығынсыз қамбаға жеткізу. Әрбір гектардан алынған астық – диқанның тынымсыз еңбегінің нәтижесі. Егін жинау науқанының сәтті өтуі ауа райына ғана емес, техниканың дайындығы мен еңбеккерлердің ұйымшылдығына да байланысты. Сондықтан шаруалар әр күнді тиімді пайдаланып, науқанды сапалы әрі шығынсыз аяқтауға күш салуда.

Қамбаға құйылған әрбір дән – дала еңбеккерлерінің маңдай тері мен ел ырысының белгісі.

Жібек МЫРЗАҒАЛИ
Суретті түсірген автор