Науырзымда ашылған музей қорында ескі сепаратор бар.

 Науырзым ауданы тарихи мұраларға бай өлке. Ол жерде Қазақстан даласы табиғи кешенінің үздік үлгісі болып табылатын мемлекеттік қорық орналасқан.

Қазақтың қасиетті жерінде баршамызға ортақ киелі жәдігері Қоянақ әулие Жолшарақызының кесенесі, Түркебай әулие Ақанұлының жерленген жері бар. Осындай қасиетті мекенде өлкетану музейінің ашылғаны қуанарлық жағдай.

Қазақ мал баққан ел ғой, сол малымен ақшасын тапқан, тамағын айырған. Отын жинап, сүт кайнатып, қаймағын айырып, майын қолмен алған. Қолмен тартатын машина – сепаратордың қазақ жерінде пайда болуы олардың жұмысын біршама жеңілдетті. Музей қорында тұрған мына сепаратор 1957 жылғы. Ауыл тұрғыны Жолдас Анаев бұл бұйыммен балалық шағын байланыстырады.

–Әкем мен шешем үйленген жылы алған басты және құнды заттары осы сепаратор болған екен. Ол  кезде  Дана-Бике  ауылында тұрамыз. Осы сепараторды ауыл болып, сүттерін тартып, пайдаланған екен. Шешем бұл құралды 90 жылдарға дейін, істен шыққанша пайдаланды. Менің балалық шағымның естелігі, – дейді Жолдас аға.

Ай ӘБДІЛДА